ବରିଷ୍ଠ ରାଜନେତା ନିରଞ୍ଜନ ପଟ୍ଟନାୟକଙ୍କ ଘରେ ଇଡି ରେଡ

ଭୁବନେଶ୍ୱର : ବରିଷ୍ଠ ରାଜନେତା ନିରଞ୍ଜନ ପଟ୍ଟନାୟକଙ୍କ ଘରେ ଇଡି ରେଡ। ପୂର୍ବତନ ପିସିସି ସଭାପତିଙ୍କ ଘରେ ପ୍ରବର୍ତ୍ତନ ନିର୍ଦ୍ଦେଶାଳୟ ଚଢଉ କରିଛି । ଦଶ ଘଣ୍ଟା ରେଡ ପରେ ନିରଞ୍ଜନ ପଟ୍ଟନାୟକଙ୍କ ଘରୁ ବାହାରିଲା ED ଟିମ୍ । କିଛି ଗୁରୁତ୍ବପୂର୍ଣ୍ଣ କାଗଜପତ୍ର ଓ ଦସ୍ତାବିଜ୍ ଧରି ବାହାରିଲା ଟିମ୍ । ତେବେ ଏନେଇ ଇଡି ଟିମ୍ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ । ନିରଞ୍ଜନ ପଟ୍ଟନାୟକଙ୍କ ପରିବାର ସଦସ୍ୟଙ୍କ ବ୍ୟାବସାୟିକ କାରଣରୁ ଏହି ଚଢଉ ହୋଇଥିବା ସୂତ୍ରରୁ ଜଣାପଡ଼ିଛି ।

ଭୁବନେଶ୍ବର ନୟାପଲ୍ଲୀରେ ନିରଞ୍ଜନ ପଟ୍ଟନାୟକ ରହୁଥିବା ବାସଭବନରେ ହୋଇଛି ରେଡ । ଏଠାରେ ନିରଞ୍ଜନଙ୍କ ସହ ତାଙ୍କ ପରିବାରର କିଛି ସଦସ୍ୟ ମଧ୍ୟ ରହୁଛନ୍ତି । ଏହା ସହ ଭୁବନେଶ୍ବରରେ ଅନ୍ୟ ଏକ ଆବାସିକ ପରିସର ଓ ରାଉରକେଲାରେ ମଧ୍ୟ ଚଢଉ ଚାଲିଥିବା ସୂତ୍ରରୁ ଜଣାପଡ଼ିଛି । ନିରଞ୍ଜନ ପଟ୍ଟନାୟକଙ୍କ ଭାଇ ଦୀପ୍ତି ରଞ୍ଜନ ପଟ୍ଟନାୟକ ଖଣି ବ୍ୟବସାୟୀ ।  ଇନ୍ଦ୍ରାଣୀ ପଟ୍ଟନାୟକ ମାଇନସ ତାଙ୍କ ମାଲିକାନାରେ ରହିଛି । ତେଣୁ ସମ୍ଭବତଃ ଏହି ଚଢଉ ବ୍ୟାବସାୟିକ କାରଣରୁ ହୋଇଥିବା ଅନୁମାନ କରାଯାଉଛି।