ପ୍ରେମ ଏମିତି ! ଅସୁସ୍ଥ ପୋଷା କୁକୁର ପାଇଁ କିଙ୍ଗ୍ ଚାର୍ଲସଙ୍କଠାରୁ ଆଓ୍ୱାର୍ଡ ନେବାକୁ ଯାଇ ନ ଥିଲେ ରତନ ଟାଟା
ଦେଶର ବିଶିଷ୍ଟ ଶିଳ୍ପପତି ରତନ ଟାଟା ଆଉ ନାହାନ୍ତି । ପ୍ରଶଂସକମାନେ ସୋସିଆଲ ମିଡିଆରେ ତାଙ୍କ ସହ ଜଡ଼ିତ ଘଟଣା ସବୁ ସେୟାର କରୁଛନ୍ତି । ରତନ ଟାଟାଙ୍କ ଦୟାଳୁ ସ୍ୱଭାବ, ଜୀବଜନ୍ତୁଙ୍କ ପ୍ରତି ଥିବା ତାଙ୍କ ଭଲପାଇବାର କାହାଣୀ ଲୋକଙ୍କୁ ଖୁବ୍ ପ୍ରେରିତ କରୁଛି । ଏହିପରି ଏକ ଘଟଣା ୨୦୧୮ର, ଯେତେବେଳେ କି, ରତନ ଟାଟା ନିଜର ଅସୁସ୍ଥ ପୋଷା କୁକୁର ପାଇଁ କିଙ୍ଗ୍ ଚାର୍ଲସଙ୍କଠାରୁ ଆଓ୍ୱାର୍ଡ ଗ୍ରହଣ କରିବାକୁ ଯାଇ ନ ଥିଲେ ।
ବ୍ରିଟେନର ରୟାଲ ଫ୍ୟାମିଲି ତରଫରୁ ରତନ ଟାଟାଙ୍କୁ ଲାଇଫ୍ ଟାଇମ୍ ଆଚିଭ୍ମେଣ୍ଟ ଆଓ୍ୱାର୍ଡ ଦିଆଯିବାର ଥିଲା । କିନ୍ତୁ ସେହି ସମୟରେ ହଠାତ୍ ତାଙ୍କ ପୋଷା କୁକୁର ଅସୁସ୍ଥ ହୋଇପଡ଼ିବାରୁ ସେ ଆଓ୍ୱାର୍ଡ ଗ୍ରହଣ କରିବାକୁ ଯାଇ ନ ଥିଲେ ।
ଭାରତୀୟ ବ୍ୟବସାୟୀ ତଥା ଅଭିନେତା ସୁହେଲ ସେଠ୍ ଥରେ ରତନ ଟାଟାଙ୍କ ସହ ଜଡ଼ିତ ଏହି ଘଟଣା ବିଷୟରେ ବର୍ଣ୍ଣନା କରିଥିଲେ । ସେ କହିଥିଲେ କି, ୨୦୧୮ରେ ୟୁକେର କିଙ୍ଗ୍ ଚାର୍ଲସ III ଏକ କାର୍ଯ୍ୟକ୍ରମ ଆୟୋଜନ କରିଥିଲେ । ଏଥିରେ ଶିଳ୍ପପତି ରତନ ଟାଟାଙ୍କୁ ତାଙ୍କ ପରୋପକାର କାର୍ଯ୍ୟ ପାଇଁ ଲାଇଫ୍ ଟାଇମ୍ ଆଚିଭ୍ମେଣ୍ଟ ଆଓ୍ୱାର୍ଡରେ ସମ୍ମାନିତ କରାଯିବାର ଥିଲା । ବ୍ରିଟିଶ ଏସିଆନ୍ ଟ୍ରଷ୍ଟ ତରଫରୁ ଏହି କାର୍ଯ୍ୟକ୍ରମ ୨୦୧୮ ଫେବୃୟାରୀ ୬ରେ ବକିଂହମ୍ ପ୍ୟାଲେସ୍ରେ ଆୟୋଜନ ହୋଇଥିଲା ।
ବଡ଼ କଥା ହେଉଛି, ଏହି କାର୍ଯ୍ୟକ୍ରମରେ ସାମିଲ ହେବା ପାଇଁ ରତନ ଟାଟା ପୂର୍ବରୁ ନିଜର ସହମତି ପ୍ରକାଶ କରିଥିଲେ । କିନ୍ତୁ ଶେଷ ସମୟରେ ପୋଷା କୁକୁରର ସ୍ୱାସ୍ଥ୍ୟ ଖରାପ ହେବାରୁ ସେ ଏହି କାର୍ଯ୍ୟକ୍ରମରେ ଯୋଗଦେବାକୁ ମନା କରି ଦେଇଥିଲେ ।
