ଐଶ୍ଵର୍ଯ୍ୟାଙ୍କ ସହ ଦ୍ଵିତୀୟ ସନ୍ତାନ ପ୍ଲାନ୍ କରୁଛନ୍ତି କି ଅଭିଷେକ ? ପ୍ରଶ୍ନ ଶୁଣି ଲାଜେଇ ଗଲେ ଜୁନିୟର ବଚ୍ଚନ

ଅଭିଷେକ ବଚ୍ଚନ ଓ ଐଶ୍ଵର୍ଯ୍ୟା ରାୟ ବଲିଉଡ୍ ଇଣ୍ଡଷ୍ଟ୍ରୀର ମୋଷ୍ଟ ଗୁଡ୍ ଲୁକିଂ ଏବଂ ଆଡୋରେବଲ୍ କପଲ୍ । କିଛି ଦିନ ତଳେ ଏକ ବିବାହ ସମାରୋହରେ ଏକାଠି ଯୋଗ ଦେଇ ଦୁହେଁ ଛାଡ଼ପତ୍ର ଗୁଜବ ଉପରେ ପୂର୍ଣ୍ଣଚ୍ଛେଦ ପକାଇ ଦେଇଛନ୍ତି ।

ଏବେ ଅଭିଷେକ ଦ୍ଵିତୀୟ ବେବି ପ୍ଲାନିଂ ବିଷୟରେ କହିଛନ୍ତି । ପ୍ରକୃତ କଥା ହେଲା, ଅଭିନେତା ରିତେଶ ଦେଶମୁଖଙ୍କ ଶୋ’ ‘କେସ୍ ତୋ ବନତା ହୈ’ରେ ଅଭିଷେକଙ୍କୁ ଦ୍ଵିତୀୟ ସନ୍ତାନ ପ୍ଲାନିଂକୁ ନେଇ ପ୍ରଶ୍ନ ପଚରା ଯାଇଥିଲା । ଏହି ପ୍ରଶ୍ନ ଶୁଣି ଅଭିଷେକ ଲାଜେଇ ଯାଇଥିଲେ ।

ରିତେଶ ଦେଶମୁଖ ଅଭିଷେକଙ୍କୁ ପଚାରିଥିଲେ ଯେ ‘ଅମିତ୍ ଜୀ, ଐଶ୍ଵର୍ଯ୍ୟା, ଆରାଧ୍ୟା ଓ ଆପଣ ଅଭିଷେକ…ଏ ସମସ୍ତ ନାମ ‘ଏ’ ଲେଟରରୁ ହିଁ ଆରମ୍ଭ ହେଉଛି । ତ ଜୟା ଆଣ୍ଟି ଓ ଶ୍ଵେତା ଏମିତି କ’ଣ କଲେ’?

ଏହା ଶୁଣି ଅଭିଷେକ କିଛି କ୍ଷଣ ପାଇଁ ଆଶ୍ଚର୍ଯ୍ୟ ହୋଇ ଯାଇଥିଲେ ଏବଂ ତା’ ପରେ କହିଥିଲେ, ‘ଏହା ସେମାନଙ୍କୁ ପଚାରିବାକୁ ପଡ଼ିବ । କିନ୍ତୁ ବୋଧହୁଏ ଏହା ଆମ ପରିବାରରେ ଏକ ପ୍ରଥା ହୋଇ ଯାଇଛି । ଅଭିଷେକ…ଆରାଧ୍ୟା…’ ।

ଏହାପରେ ରିତେଶ ଅଭିଷେକଙ୍କୁ ଟିଜ୍ କରି କହୁଛନ୍ତି କି, ‘ଆରାଧ୍ୟାଙ୍କ ପରେ…’? ଏହା ଉପରେ ଅଭିଷେକ କହୁଛନ୍ତି, ‘ନା, ଏବେ ପରବର୍ତ୍ତୀ ପିଢ଼ି ଯେବେ ଆସିବ, ସେବେ ଦେଖିବା’ । ପୁଣି ରିତେଶ କହିଥିଲେ, ‘ଏତେ ଦିନ କିଏ ଅପେକ୍ଷା କରେ’? ସେ ଇସାରା ଇସାରାରେ ଅଭିଷେକଙ୍କୁ ଐଶ୍ଵର୍ଯ୍ୟାଙ୍କ ସହ ଦ୍ଵିତୀୟ ସନ୍ତାନ ପ୍ଲାନ କରିବାକୁ ପରାମର୍ଶ ଦେଇଛନ୍ତି ।

ତେବେ ଦ୍ଵିତୀୟ ସନ୍ତାନ କଥା ଶୁଣି ଜୁନିୟର ବଚ୍ଚନ ବ୍ଲସ୍ କରିବାକୁ ଲାଗିଥିଲେ । ସେ କହିଥିଲେ, ରିତେଶ ବୟସକୁ ଦେଖ, ମୁଁ ତୁମଠାରୁ ବଡ଼ । ଏହାପରେ ରିତେଶ ମସ୍ତି ମଜାକରେ ଅଭିଷେକଙ୍କ ପାଦ ଛୁଇଁଥିଲେ, ଯାହାକୁ ଦେଖି ସେଠାରେ ଥିବା ଲୋକେ ହସିବାକୁ ଲାଗିଥିଲେ ।